អំពើ​ល្អ និង​អាក្រក់

មនុស្សប្រឈមមុខនឹងភាពមិនទៀងទាត់ ហើយមានការយល់ឃើញខុសគ្នា ដូចនេះត្រូវការសេរីភាព​ដើម្បី​ធ្វើ​ឲ្យ​ដំណើរ​ជីវិត​ខ្លួន​រលូនទៅមុខ ។ ដូចនេះសេរីភាពក្នុងការជ្រើសរើសការធ្វើសកម្មភាពអ្វីមួយ នាំ​ឲ្យ​លទ្ធផល​ស្តែង​ឡើង​ផ្សេង​គ្នា ។ ផល​ផ្សេង​គ្នានេះ នាំទៅរកសកម្មភាពបែងចែកផលឡើងវិញ ដោយ​សារ​មនុស្ស​តែង​តែ​វាយ​​តម្លៃ​ខុស​លើ​ការ​ខំ​ប្រឹង​របស់​មនុស្ស​ផ្សេង​ក្រៅពីខ្លួន ។ ក្នុងន័យនេះ ដែលនាំឲ្យកើតជាអំពើល្អ និងអំពើអាក្រក់ ។ អំពើល្អ ឬអាក្រក់ គ្រាន់​តែ​ជា​ទិដ្ឋភាព​ពីរ​នៃ​ការយល់ឃើញរបស់អ្នកប្រព្រឹត្តអំពើ និងអ្នករងអំពើប៉ុណ្ណោះ ។ វាពិបាកនឹងរកខ្នាតមួយដែលត្រឹមត្រូវ ដើម្បី​វាស់​វែង​ឲ្យ​បាន​ប្រាកដណាស់ ។ អំពើល្អរបស់អ្នកភាគច្រើន ជាអំពើអាក្រក់នៃអ្នកភាគតិច ។ ដូចគ្នាដែរ អំពើល្អរបស់អ្នកភាគតិច ជាអំពើល្អរបស់អ្នកភាគច្រើន ។ បើសិនជាអ្នកទីបី កំណត់អំពើល្អ ឬអាក្រក់ ដោយភាពភាគល្អខ្លះនៃអំពើអាក្រក់ និង​ភាគ​ល្អ​ខ្លះនៃអំពើល្អ គេអាចបានអំពើល្អ និងអាក្រក់មួយបែបផ្សេងទៀត ។ ដូចនេះបន្ទាត់កាត់សេចក្ដីនៃអំពើល្អ និង​អំពើ​អាក្រក់ មិននៅស្ថិតថេរទេ វាអាស្រ័យទៅលើ លក្ខខណ្ឌស្មុគ្រស្មាញជាច្រើន ។

បើ​សិន ជីវិតជាល្ខោន(ល្បែង) ដែលមនុស្សម្នាក់ៗប្រកាន់តួនាទីមួយ ៗ រៀងខ្លួន ។ ដូចនេះ មនុស្ស​ទាំង​នោះ​ត្រូវ​មាន​សេរីភាព​ក្នុងការជ្រើសរើសតួអង្គ ហើយសម្ដែងតាមសមត្ថភាព ដោយធានាផលដែលទទួលបានសមតាមកម្លាំង និង​តាម​ការ​ខំប្រឹង​ប្រែង ។ តើអ្វីដែលជាអ្នកធានាពីការទទួលផលសមស្រប គឺ ក្រឹត្យក្រមល្បែង ឬ ច្បាប់ ។ សីលធម៌ និង​គុណ​ធម៌​ជាគោលការណ៍មួយ ដែលជាសម្ពាធផ្លូវសតិអារម្មណ៍ឲ្យគ្រប់តួអង្គសង្គមទាំងអស់ គោរពក្រឹត្យក្រមល្បែង ដែល​ទទួល​ស្គាល់​ជាសាធារណៈ ។ ប៉ុន្តែនៅពេលសង្គមមួយ ចាប់ផ្តើមបណ្ដុះគំនិតសីលធម៌ អំពើអសីលធម៌ចាប់ផ្ដើមកើតឡើង ដោយ​សារចរិតចង់បានសេរីភាពរបស់មនុស្ស ច្បាប់ត្រូវតែវិវឌ្ឍកាន់តែស្មុគ្រស្មាញឡើង ដើម្បីបំបាត់អំពើអសីលធម៌ ឲ្យ​មាន​ប្រសិទ្ធភាព ។ បើច្បាប់រឹងត្អឹងពេក ពេលនោះហាក់ដូចជាដើរតួនាទីជាអ្នកឃាឃាំងសេរីភាព ដែល​ជា​ការ​ប្រឈម​មុខ ជំរុញឲ្យអំពើអសីលធម៌កើតមានជាប្រចាំ ។ ដូចនេះ សង្គមមនុស្សមិនអាចគ្មានអំពើអសីលធម៌ឡើយ អត្រា​ជា​សារ​ជាតិ​មួយ តែងតែមានអត្ថិភាពនៅក្នុងសង្គមនោះ ។ អត្រានោះខ្ពស់ ឬទាបអាស្រ័យទៅលើកត្ដាជាច្រើន ឆ្វាក់​គ្នា​បង្កើត​ជា​ផល ដែលយើងអាចសង្កេតឃើញ ។

ដូច​នេះ​ការ​គ្រប់​គ្រង អំពើ​អាក្រក់​ ជា​ការ​តស៊ូ​មួយ ដូច​ការ​កូរ​សមុទ្រ​ទឹក​ដោះ​អញ្ចឹង យើង​ទាំ​ងអស់​គ្នា​ត្រូវ​មាន​ជំនឿ​ថា​ព្រះ​អាទិទេព​ តែង​តែ​ឈរ​ខាង​យើង​ជានិច្ច ហើយ​ធានា​ថា​ទឹក​អម្រឹត​ប្រាកដ​ជា​ផ្ដល់​ផល​ចំពោះ​អ្នក​ដែល​ប្រព្រឹត្ត​ល្អ​ ។ យើង​មិន​ត្រូវ​ឆ្ងល់​ថា​ ក្នុង​ដំណើរ​កូរ​សមុទ្រ​ទឹក​ដោះ​ថា​ ហើយ​អ្វី​អ្នក​ប្រព្រឹត្ត​អំពើ​អាក្រក់​ទទួល​បាន​ផល​ខ្លះ​នោះ​ទេ ពី​ព្រោះ​អ្នក​ប្រព្រឹត្ត​អាក្រក់​ក៏​បញ្ចេញ​កម្លាំង​កាយ កម្លាំង​ចិត្ត​ ដែរ ។